శరణు వేడెద యజ్ఙసంభవ రామ

 జై శ్రీమన్నారాయణ 

రాగం : హంసానంది 

పాడినవిధానాం : శ్రీమాన్ బాలకృష్ణప్రసాద్ గారు 

సంపుటి 3, సంకీర్తన 155

శరణు వేడెద యజ్ఙసంభవ రామ 

అరసి రక్షించు మమ్ము అయోధ్యరామ 

ధారుణిలో దశరధతనయ రామ 

చేరిన అహల్యను రక్షించిన రామ 

వారిధిబంధన కపివల్లభ రామ 

తారకబ్రహ్మమైన సీతాపతి రామ 

ఆదిత్య కులాంబుధి మృగాంక రామ! హర -

కోదండభంజనము చేకొనిన రామ 

వేదశాస్త్ర పురాణాది  వినుత రామ 

ఆదిగొన్న తాటకసంహార రామ 

 

రావణుని భంజించిన రాఘవ రామ 

వావిరి విభీషణవరద రామ 

సేవ నలమేల్మంగతో శ్రీ వేంకటేశుడవై 

ఈవల  దాసుల నెల్లా నేలినట్టి రామ 

        

శరణు శరణు నీకు జగదేక వందిత

జై శ్రీమన్నారాయణ 

సంపుటి 4, సంకీర్తన 276

రాగిరేకు 347

రాగం : ఛాయ 

పాడినవారు : గరిమెళ్ళ అనిలకుమార్ గారు. 

శరణు శరణు నీకు జగదేక వందిత 
కరుణతో మమ్ము నేలు కౌసల్య నందన 

ఘన రణరంగ విక్రమ దశరథ పుత్ర
వినుతామరస్తోమ వీర రాఘవ 
మునులును ఋషులును ముదమునొందిరి నీవు 
జననమందినందుకు జానకీరమణ 

సులభ లక్ష్మనాగ్రజ సూర్యవంశతిలక 
జలధిబంధన విభీషణ వరద 
తలకి అసురులు పాతాళము చొచ్చిరి నీవు

విలువిద్య నేర్చితేనే విజయరామ

రావణాంతక  సర్వ రక్షక నిర్మల భక్త 
పావన దివ్యసాకేత పట్టణ వాస
వేవేలుగ నుతించిరి  వెస హనుమంతాదులు
సేవించిరి  నిన్నుచూచి శ్రీ వేంకటేశ

కొండలలోనెలకొన్న కోనేటిరాయడు వాఁడు

 జై శ్రీమన్నారాయణ 

రాగం : హిందోళం 

పాడినవిధానాం : శ్రీమాన్ బాలకృష్ణ ప్రసాద్ గారు 

సంపుటి 1, సంకీర్తన 151

కొండలలోనెలకొన్న కోనేటిరాయడు వాఁడు  

కొండలంతవరములు గుప్పెడు వాఁడు 

కుమ్మరదాసుడైనకురువరతినంబి 

ఇమ్మన్నవరములెల్ల ఇచ్చినవాఁడు  

దొమ్ములు సేసినయట్టి  తొండమాంజక్కురవర్తి 

రమ్మన్న చోటికి వచ్చి నమ్మినవాఁడు 

అచ్చపువేడుకతోడ అనంతాళువారికి 

ముచ్చిలి వెట్టికి  మన్ను మోచినవాఁడు 

మచ్చిక దోలక తిరుమలనంబితోడుత 

నిచ్చనిచ్చ మాటలాడి నొచ్చినవాఁడు 

కంచిలోన నుండ తిరుకచ్చినంబిమీద కరు-

ణించి తనయెడకు రప్పించినవాఁడు 

యెంచ నెక్కుడైన వేంకటేశుడు మనలకు 

మంచివాడై కరుణ పాలించినవాఁడు 

కలియుగ ప్రత్యక్ష దైవం శ్రీ వెంకటేశ్వరసామివారు కొండలలో  కొలువై ఉండటమే కాదు, కొండలంతవరాలను గుప్పే దొడ్డదొర అని అన్నమయ్య ఈ పాటలో కీర్తిస్తున్నారు. రాజు అర్పించిన బంగారు పూలను వద్దని, మహాభక్తుడైన కురువనంబి (కుమ్మరిదాసు) అర్పించిన బంకమట్టి పూలను స్వీకరించి అనుగ్రహించిన ఉన్నతోన్నతమూర్తి వేంకటేశ్వరుడు!  ఆశ్రితుడైన  తొండమాన్ చక్రవర్తికి శంఖచక్రాలను అనుగ్రహించినవాడు శ్రీనివాసుడు! అనంతాళ్వార్ల  వారి పుష్పకైంకర్యాన్ని స్వీకరించి అనుగ్రహించినవాడు స్వామి! తిరుమలనంబిని బ్రోచినవాడు! భక్తుడైన తిరుకచ్చినంబిని కంచి నుండి తన వద్దకు రప్పించుకున్నవాడు! అట్టి వేంకటేశ్వరుడు భక్తులైన మనందరినీ అపారమైన కరుణతో పాలిస్తున్నాడు అని ఆచార్యులవారు అంటున్నారు. 

 

గతులన్ని ఖిలమైన కలియుగమందును

 

జై శ్రీమన్నారాయణ 

రాగం : మోహన 

సంపుటి 2, సంకీర్తన 372 

పాడినవిధానం : శ్రీమాన్ బాలకృష్ణప్రసాద్ & శ్రీ అనిలకుమార్ 

గతులన్ని ఖిలమైన కలియుగమందును
గతి ఈతడే చూపె ఘన గురుదైవము

అన్నమాచార్యుల వారు తనకు శ్రీవైష్ణవ సంప్రదాయ ప్రభావం భగవద్రామానుజుల వారి వల్ల కలిగింది అని చెప్తారు, వారి మీద రాసిన కీర్తన ఇది, 

ఈ కలియుగంలో దారులన్నీ పాడైపోతూ ఉంటే వారే ఒక దారై చూపిన మహా గురువులు రామానుజులు అంటారు. 

ఈతని కరుణనేకా ఇలవైష్ణవుల మైతి
మీతని వల్లనే కంటి మీ తిరుమణి
ఈతడే ఉపదేశమిచ్చెను అష్టాక్షరి మంత్రము
ఈతడే రామానుజులు ఇహపర దైవము

వారి వలన మనం విష్ణుభక్తులమైనాము, వారి వలన వైకుంఠ మణి చూడగలిగాం, వారివల్లనే మనం నారాయణ అష్టాక్షరీ మంత్రము పలుకగలిగాం, ఆయినే రామానుజులు ఈ భూతలంమీద నడిచే దైవం అంటున్నారు. 

వెలయించె నీతడేకా వేదపు రహస్యములు
చలిమి నీతడే చూపె శరణాగతి
నిలిపినాడీతడే కా నిజముద్రా ధారణము
మలసి రామానుజులు మాటలాడే దైవము

వేదాలలోని సంక్లిష్ట రహాస్యాలను మనకు వివరించారు, శరణాగతి మార్గాన్ని మనకు చెలిమితో చూపారు, శంఖచక్ర (నిజముద్రధారణ) ధరియించినవాడు. నిజానికి రామానుజులు మనతో మాట్లాడే దైవము అంటారు అన్నమయ్య. 

స్వామిని చేరేందుకు నియమాలని పెట్టనివారు, మనకి మోక్షమార్గాన్ని ప్రసాదించి, ఆ వేంకటేశ్వర స్వామి కి చేరువైన మనకి తల్లి తండ్రిలా దయచూపిన వారు అంటారు అన్నమయ్య 

నియమములు ఈతడేకా నిలిపె ప్రపన్నులకు
దయతో మోక్షము చూపె తగనీతడు
నయమై శ్రీవేంకటేశు నగమెక్కె వాకిటను
దయచూచి మమ్మునిట్టే తల్లిదండ్రి

 

ముద్దుగారే యశోద ముంగిటి ముత్యము వీడు

           జై శ్రీమన్నారాయణ 

సంపుటి 3, సంకీర్తన 577 

రాగం : కురంజి 

పాడినవిధానం : బాలకృష్ణ ప్రసాద్ గారు 

            ముద్దులొలుకు బాలకృష్ణడు యశోదమ్మ ముంగిటి ముత్యమైనాడు ఈ దేవకీసుతుడి మహిమలు తిరుగులేనివి కదా! అంటూ నందనందనుడి విలాసాలను నవరత్నాలతో సరిపోల్చుతున్నారు అన్నమాచార్యుల వారు. 

దిద్దరాని = తిరుగులేని (వంకలు పెట్టుటకు వీలులేని) సతమై = శాశ్వతమై, పంటమాడే = ఎదురుతిరిగిన, కాంతుల = కాంతులుకల, పాలజనిధి = పాలసముద్రము, పద్మనాభుడు = పద్మము నాభియందు కలవాడు (మహావిష్ణువు) 

           ముద్దుగారే యశోద ముంగిటి ముత్యము వీడు
           తిద్దరాని మహిమల దేవకీ సుతుడు

అంత నింత గొల్లెతల అరచేతి మాణిక్యము
పంత మాడే కంసుని పాలి వజ్రము
కాంతుల మూడు లోకాల గరుడ పచ్చ బూస
చెంతల మాలో నున్న చిన్ని కృష్ణుడు

రతికేళి రుక్మిణికి రంగు మోవి పగడము
మితి గోవర్ధనపు గోమేధికము
సతమై శంఖ చక్రాల సందుల వైడూర్యము
గతియై మమ్ము గాచేటి కమలాక్షుడు

కాళింగుని తలలపై గప్పిన పుష్యరాగము
యేలేటి శ్రీ వేంకటాద్రి యింద్రనీలము
పాల జలనిధి లోన బాయని దివ్య రత్నము
బాలునివలె దిరిగీ బద్మ నాభుడు

 

బ్రహ్మ కడిగిన పాదము

 జై శ్రీమన్నారాయణ 

రాగం : ముఖారి 

సంపుటి : 1, సంకీర్తన : 191

పాడిన విధానం : శ్రీమాన్ బాలసుబ్రమణ్యం 

స్వరకల్పన : రమేష్ నాయుడు గారు 

బ్రహ్మ కడిగిన పాదము 

బ్రహ్మము తానె నీ పాదము 

చెలఁగి వసుధ గొలిచిన నీ పాదము 

బలితల మోపిన పాదము 

తలకక గగనము తన్నిన పాదము 

బలరిపు గాచిన పాదము 

కామిని పాపము కడిగిన పాదము 

పాము తలనిడిన పాదము 

ప్రేమపు శ్రీసతి పిసికెడి పాదము 

పామిడి తురగపు పాదము 

పరమయోగులకు పరిపరి విధముల 

వర మొసగెడి నీ పాదము 

తిరువేంకటగిరి తిరమని చూపిన 

పరమపదము నీ పాదము 

త్రివిక్రమాకృతి (వామనావతారంలో) దాల్చినపుడు స్వామీ వారి పాదం బ్రహ్మలోకానికి వ్యాపించినదిట! అప్పుడు బ్రాహాముదేవుడు స్వామీ పాదాన్ని అభిషేకిస్తాడు! అందుకే అన్నమయ్య బ్రహ్మకడిగిన పాదము అని అంటున్నాడు. అట్టి ఈ పాదము సకలలోకాలకు పరబ్రహ్మమైనది! ఈ పాదం వసుధనే కొలిచినది! బలి తలను పాతాళానికి త్రొక్కినది! ఆకాశాన్నింటినది! అహల్య పాపాన్ని  ప్రక్షాళన చేసినది! కాళిందునిపై నాట్యమాడినది! ప్రేమతో శ్రీసతి చేత ఆరాధింపబడేది! కల్క్యావతారంలో గుర్రాన్ని అధిరోహించేది! పరమయోగులకు అనేక విధాలుగా ముక్తిని అనుగ్రహించేది! అట్టి ఈ పాదము కలియుగంలో వేంకటాద్రి పై కొలువైనది! పరమపదాన్ని అందించే ఈ పాదాన్ని ఆశ్రయిద్దాం! ధన్యులమవుదాం!!